|
په‌یامی حزبی کۆمۆنیستی کرێکاریی کوردستان بۆ کۆنگره‌ی نۆهه‌می حزبی کۆمۆنیستی کرێکاریی حکمه‌تیست/ خه‌تی ڕه‌سمی
هاورێیان، ئه‌ندامان و ئاماده‌بووانی کۆنگره به‌سڵاوێکی گه‌رم سه‌ره‌تا پیرۆزبایی به‌ستنی کۆنگره‌ی نۆهه‌م له هه‌موو دۆستان و لایه‌نگران و سه‌رجه‌م ئه‌ندامانی حزبی حیکمه‌تیست-خه‌تی ره‌سمی ده‌که‌ین و ئومێده‌وارین کۆنگره سه‌رکه‌وتوانه له‌سه‌ر ڕێگای ئه‌و ئامانجانه‌ی که بۆخۆی دایناوه، هه‌نگاو هه‌ڵگرێ. به‌دیاریکراویش ئومێده‌که‌ین ئه‌م کۆنگره‌یه له‌په‌یوه‌ند به دۆخی سیاسی هه‌ستیاری ئێستای ئێران و خه‌بات بۆ به‌سه‌رکه‌وتن گه‌یاندنی جوڵانه‌وه‌ی شۆڕشگێرانه‌ی کرێکاران و زه‌حمه‌تکێشانی ئێران، کاریگه‌ری به‌کرده‌وه دابنێ و ئاسۆیه‌کی سیاسی و عه‌مه‌لی کۆمۆنێستی بخاته به‌رده‌م خه‌باتکارانی ڕێگای ئازادی و یه‌کسانی و سۆشیالیزمه‌وه له ئێران.
ئەو بابه‌تانەی که پێمان وایه بابه‌تگه‌لێکی گرنگن و ڕاسته‌وخۆش په‌یوه‌ندیان هه‌یه به خه‌باتی هاوبه‌شی کۆمۆنیسته‌کان و چینی کرێکار له ئێران و کوردستان و ناوچه‌که، به‌پێویستی ده‌زانین له‌م په‌یامه کورته‌دا سەرنجی ئامادەبوانی گۆنگرەی بۆ راکێشین: یه‌کێک له‌و مەسەلانەی پێویستە په‌نجه‌ی بۆرابکێشین، مه‌سه‌له‌ی به‌ده‌سته‌وه‌گرتنی ئیستراتیژیه‌کی ڕۆشنی کۆمۆنیستی و ئاسۆیه‌کی سیاسی و خه‌باتکارانه‌یه به‌رامبه‌ر به دۆخی دونیای ئه‌مڕۆ و جه‌نگ و کاولکاری و ئاواره‌یی و کێشمه‌کێشێک که هێزه ئیمپریالیستیه‌کان کۆمه‌ڵگای به‌شه‌ریان له‌گه‌ڵدا رووبه‌رووکردۆته‌وه، ئیستراتیژیه‌ک که بتوانێ خه‌باتی كۆمۆنیسته‌كان له جیهان و ناوچه‌كه‌دا كۆبكاته‌وه و یه‌كیبخات. بهتایبهتی ئێمه شاهیدی ئه‌وه‌ین که ئه‌ده‌بیاتی یه‌ک دوو ساڵی رابردووی حزب، ڕۆشناییه‌کی باشی بۆ لێکدانه‌وه‌ی دۆخی ناوچه‌که و جه‌نگی ئیمپریالیسته‌کان و رووداوه‌کانی خستۆته‌ڕوو، ته‌نانه‌ت له‌سه‌ر گه‌لێک له رووداوه‌کان سیاسه‌تی دروستی به‌ده‌سته‌وه‌داوه، که خۆمان له‌گه‌ڵیاندا به هاوبه‌ش زانیوه. به‌‌ڵام به‌م ڕاستیه‌شه‌وه له ئاستی ماکرۆ و گشتیدا هێشتا جێگای ئیستراتیژیه‌کی سیاسی و عه‌مه‌لی کۆمۆنیستی به خاڵی ماوه‌ته‌وه و هێشتا ئاسۆیه‌کی کۆمۆنیستی به‌ده‌سته‌وه نییه که له سایه‌یدا خه‌باتی چینی کریکار له ئاست ناوچه‌که‌دا ڕێنوێنی بکا و کاریگه‌ری کۆمۆنیزم و کرێکار به‌سه‌ر روداوه‌کانی ئه‌م ده‌وره‌یه‌وه به‌جێبهێڵی. هیوادارین کۆنگره به حه‌ساسیه‌تێکی زۆره‌وه له‌م ئه‌رکه بڕوانێ تا بە هەموو لایەکمان هەوڵ بدەین رۆشنایی زیاتر بخەینە سەر ئەم بابەتە. بابه‌تێکی تر مه‌سه‌له‌ی ڕوخانی ڕژێمی جمهوری ئیسلامی و نه‌خشی ناڕه‌زایه‌تیه‌کانی ئه‌م دواییانه‌ی خه‌ڵکی شاره‌کانی ئێران و ده‌رسێکه که ده‌بێ له‌م جۆڵانه‌وه‌یه وه‌ری بگرین. له‌م باره‌وه هیچ گومان له‌وه‌دا نییه که ڕووخانی جمهوری ئیسلامی، وه‌ک ئه‌وه‌ی قه‌ڵا و سه‌نته‌ری کۆنه‌په‌رستیه له ناوچه‌که‌دا، ئه‌گه‌ر له ڕێگای شۆڕش و جوڵانه‌وه‌یه‌کی شۆڕشگیرانه‌وه مه‌یسه‌ر بێت که ڕابه‌ریه‌که‌ی له ده‌ستی کۆمۆنیسته‌کاندا بێت، ئه‌وا نه‌ک هه‌ر داهاتوی کۆمه‌ڵگای ئیران، بگره دۆخی ئێستای ناوچه‌که و جیهانیش سه‌ره‌وبن ده‌کاته‌وه و کاریگه‌ری گه‌وره و مه‌زن به قازانجی خه‌باتی کرێکاران و کۆمۆنیسته‌کان له بوعدی جیهانیدا دێنێته‌کایه‌وه. ئه‌م راستیه به‌قه‌د ئه‌وه‌ی که ڕۆڵ و نه‌خشی چینی کرێکار و کۆمۆنیسته‌کان له ئێران، پڕ بایه‌ختر ده‌کا و له‌ڕیزی پێشه‌وه‌ی خه‌باتی ئه‌نته‌رناسیونالیستی دایده‌نێ، به‌هه‌مان راده‌ش رووبه‌ڕوی ئه‌رکی گرنگ و خه‌باتی جدی و لێبراوانه ده‌کاته‌وه، ئه‌رک و خه‌باتێک که کۆمۆنیزم له کایه‌ی سیاسی ئێران و له کرده‌ی شۆڕشگێڕانه‌ی چینی کرێکار و جه‌ماوه‌ری برسی و ناڕازیدا به‌عینوانی رابه‌ری سیاسی و کۆمه‌ڵایه‌تی ده‌ربێنێ و لێره‌شه‌وه مۆری خۆی له خه‌باتی راسته‌وخۆ بۆ ڕوخاندنی جمهوری ئیسلامیه‌وه بنێ. بێگومان له‌م پێناوه‌شدا خه‌بات بۆ گه‌یشتن به حزبێکی سیاسی و کۆمه‌ڵایه‌تی و داڕشتنی نه‌خشه عه‌مه‌لێکی ڕۆشن به ئاراسته‌ی بیناکردنی حزبیکی سیاسی رابەر و رێکخەری کۆمەڵگا کە حزبی هه‌ڵسوڕاوانی کۆمۆنیست و کرێکاری و رابه‌رانی عه‌مه‌لی خه‌باتی کرێکاری و جه‌ماوه‌ری له‌ناوخۆی ئێراندا بێت و ڕیشەی خۆی له کارگه و گه‌ره‌ک و زانکۆ و ناوه‌نده‌کانی کاردا دابکوتێت، جه‌وهه‌ریترین مه‌سه‌له‌یه که پێمان وایه ده‌بێ کۆنگره ئاوڕی جدی لێبداته‌وه. بهتایبهتی که خۆپیشاندان و ناڕه‌زایه‌تیه‌کانی ئه‌م دواییانه، ئه‌و ده‌رسه‌ی به ڕۆشنی نیشاندا که بوونی کۆمۆنیزم و حزبی کۆمۆنیستی له ناوخۆی ئێران، به‌رابه‌ریه‌کی کارامه‌ی سیاسی و کۆمه‌ڵایه‌تیه‌وه ئه‌ڵقه‌ی ناوکۆیی ده‌ستبردنه بۆ هه‌ر جۆره کرده‌یه‌کی سیاسی و عه‌مه‌لی، تا ئاستی ئه‌وه‌ی که رابه‌ری بزوتنه‌وه‌ی ڕوخانی ڕژێمی نه‌گریسی ئیسلامی سه‌رمایه به ده‌سته‌وه‌بگرێ و خه‌باتی چینی کرێکار و زه‌حمتکێشان به‌ره‌و حکومه‌تی کرێکاری و سۆشیالیزم ئاڕاسته بکات. هه‌ر له‌په‌یوه‌ند به مه‌سه‌له‌ی ڕووخاندنی ڕژێمی جمهوری ئیسلامی ئێرانه‌وه به پێویستی ده‌زانین سه‌رنجی کۆنگره بۆ ئه‌و خاڵه رابکێشین که ئه‌ویش خه‌ته‌ری ده‌خاڵه‌تی سیاسی و سه‌ربازی دەولەتانی غەربی و زلهێزە جیهانیەکان بە تایبەتی ئه‌مریکا و ناتۆ ، له ئێراندا و گۆڕینی مه‌جرای خه‌باتی شۆڕشگێرانه‌ی خه‌ڵکی کرێکار و زه‌حمه‌تکێشه به سینارێوی هاوشێوه‌ی سوریا و لیبیا.. بهتایبهتی، که هێزه ئیمپریالیسته‌کان له‌م رووه‌وه ته‌جروبه‌یان له ئاست ناوچه‌که‌دا هه‌یه و هه‌رگیز ڕێگه به‌و غافڵگیریه ناده‌ن که له‌به‌رامبه‌ر شۆڕش و راپه‌رینی تونس و میسردا تێی که‌وتن. هه‌ربۆیه ده‌بێ کۆنگره له‌په‌یوه‌ند به بارودۆخی سیاسی ئێران و هه‌وڵدانی حزب بۆ به سه‌ره‌نجام گه‌یاندنی بزوتنه‌وه‌ی روخانی ڕژێمه‌وه، ئه‌م خه‌ته‌ره به جدی بگرێ و ئه‌رک و وه‌زائیفی کۆنکرێت له ڕاستای به‌رگرتن به سیناریۆی تەڵخی ئەم زلهێزە کۆنەپەرستانە و بردنی کۆمه‌ڵگای ئێران به‌ره‌و فه‌زای جه‌نگ و کاولکاری، له‌ئه‌ستۆبگرێ. فه‌زایه‌ک که ڕێگاده‌کاته‌وه بۆ سه‌رهه‌ڵدانی ئه‌نواعی ده‌سته‌جاتی چه‌کداری قه‌ومی و ئیسلامی و تیرۆریست. بهتایبهتی که هه‌رگیز ناکرێ دۆخی ئیستای ئێران و خه‌بات بۆ روخانی ڕژێم له‌ڕه‌وه‌نده جیهانی و ناوچه‌ییه‌کان جیابکرێته‌وه و نه‌هێندرێنه حساباتی لێکدانه‌وه و هه‌ڵوێستگیریه سیاسیه‌کانمانه‌وه. بابه‌تێکی تر که دیسانه‌وه به خاڵه‌کانی پێشوتره‌وه په‌یوه‌ندی هه‌یه، ئه‌ویش ئەو دۆخە په‌رشوبڵاوەیە کە بەسەر بزووتنەوەی کۆمۆنیزمی کرێکاری و حیکمه‌تیسته‌کاندا هاتووە. به پێویستی ده‌زانین سه‌رنجی کۆنگره‌ی بۆ ڕاکێشین. له‌مباره‌وه ئه‌گه‌ر پێمان وابێت له ئارادابوونی حزبێکی سیاسی و کۆمه‌ڵایه‌تی شۆڕشگێڕ و به‌هێز، فاکتۆری بڕیارده‌ره له دۆخی ئێستای ئێران و ناوچه‌که‌دا، ئه‌وا ده‌بێ به‌جدیه‌وه ئاوڕێک له دۆخی په‌رشوبڵاوی بزووتنەوەکەمان لە ئێراندا بده‌یه‌نه‌وه، ده‌بێ ده‌رس له ڕابردووی جوڵانه‌وه‌که‌مان وه‌ربگرین و بێڕه‌حمانه ڕه‌خنه‌گری هه‌موو ئه‌و سونه‌ت و هه‌ڵوسوکه‌وت و سیکته ناسیاسی و ناکۆمه‌ڵایه‌تیانه بین که کۆسپن له‌سه‌ر ڕێگای هاتنه‌کایه‌وه و زامنکردنی حزبێکی یه‌کپارچه‌ی کۆمۆنیستی. هاوڕێیان! ئەمڕۆ نەبوونی حزبێکی سیاسی رابەر و سازماندە، هەروەها نەبونی رابەریەکی کۆمۆنیستی بۆ کۆمەڵگای ئێران، بۆشایی و قورساییەکی گەورەمان نیشان ئەدات نەک هەر لەسەر بزووتنەوەی کۆمۆنیستی بەڵکو لەسەر هەر خەبات و تیکۆشانێک كه لە پیناو ئازادی و بەختەوەریدایە. رەنگە هەر یەک لە حزب و گروهەکانی ئێستای سەر ساحەی سیاسی ئێران بتوانن لیستێک لە کاری لێرەولەوێ بۆ خۆیان دابڕێژن و تەنانەت دڵی خۆیانی پێ خۆش بکەن، بەڵام وەکو رۆژی روناک دیارە کە لیستی کار و ئەوەی جێگای دڵخۆشیانە زۆر دوورە لەوەی کە چینی کرێکار و کۆمۆنیزم لە ئێران پێویستی پێیەتی، زۆر دوورە لەوەی کە بتوانێ بە وێنەی رابەریەکی کۆمۆنیستی ببێتە جێگای باوەڕ و ئیعتمادی سەدان هەڵسوڕاو و رابەری کرێکاری کۆمۆنیستی و حیکەمەتی کە هەم و خەمیان سازدان و رابەری کردنی شۆڕشی کریکارییە لە ئێراندا. بۆیە تێپەڕاندنی ئەم دۆخە ئیمکانی نابێت بەبێ ئاوڕدانەوەیەکی رەخنەگرانە و جەسورانە لەو رەوەندەی کە کۆمۆنیزمی کرێکاری ئێرانی لە بزوتنەوەیەکی حزبی بەهێزەوە گۆڕی بۆ چەند گروپێکی کەم تەئسیر. بەداخەوە لەو مێژووەدا رابەرانی ئەم بزووتنەوەیە نیشانیاندا کە نەیانتوانی یەکپارچەیی حزبێک بپارێزن کە بەرهەمی چارەکە سەدەیەک لە خەباتی کۆمۆنیستی و ژیانی پڕباری رابەرێكی وەکو مه‌نسوری حیکەمت بوو. ئەوەی دەتوانێ لە ئێستا و ئایندەدا بەسەر ئەم گرفتەدا زاڵ بێت و وەکو رابەرییەکی کۆمۆنیستی باوەڕی سەدان و هەزاران کۆمۆنیستی خەباتکار لە ناوەوە و دەرەوەی ئێران بۆ خۆی بەدەستبهێنێت، ئەوە ئەو رابەریەییە کە بێ رەحمانە دەچێتە پای جەنگی ئەو سوننەت و روانگە و شێوەکار و بۆچونانەی كه بزووتنەوەی کۆمۆنیزمی کرێکاری ئێرانی بەمڕۆ گەیاند. ئومێد و چاوه‌ڕوانی ئێمه ئه‌وه‌یه که کۆنگره ئەم بابەتە بە جدی وەرگرێت و بەدور لە هەرجۆرە تەعەسوبیک بیر لەم دۆخە و لە پەرتوبڵاوی هەزاران کۆمۆنیست و رابەری کرێکاری و حیکمه‌تی بکاتەوە و تەسلیم بەو دۆخەی ئێستا نەبێت و لە کەناریەوە تێنەپەرێت.
له یه‌کساڵی ڕابردوودا، له‌سه‌ر کۆمه‌ڵه رووداو و پێشهاتێک که له‌ناوچه‌که و کوردستاندا ڕوویاندا و ڕه‌وته کۆمۆنیست و چه‌په‌کانی ڕاکێشا بۆ خستنه‌رووی بۆچوون و ڵێکدانه‌وه و هه‌ڵوێسته‌کانیان، له‌وانه‌ش حزبی حیکمه‌تیست_خه‌تی ره‌سمی و حزبی کۆمۆنیستی کرێکاریی کوردستان، له‌م ڕوه‌وه هاوهه‌ڵوێستی و هاوخەتی له بۆچوون و لێکدانه‌وه‌کانیادا خۆی نیشاندا، به‌دیاریکراوی له‌سه‌ر مه‌سه‌له‌کانی شه‌ری داعش، جه‌نگی موسڵ، ڕیفراندۆم و دۆخی سیاسی کوردستان.... ئێمه پێمان وایه ئه‌مه ده‌ستکه‌وتی ده‌وره‌یه‌ک له خه‌بات و تێکۆشانه و نه‌ک نابێ فه‌رامۆش بکرێ، به‌ڵکو ده‌بێ وه‌ک سه‌ره‌تا‌یه‌ک بۆ هه‌نگاونانی گه‌وره‌تر له‌خه‌باتی هاوبه‌شماندا، به‌ئاراسته‌ی له ئه‌ستۆگرتنی ئه‌رکه‌کانی کۆمۆنیزم و جوڵانه‌وه‌که‌مان به‌هاوبه‌شی بۆی بڕوانین و له‌ده‌وری پڕۆژه و نه‌خشه‌ی عه‌مه‌لی هاوبه‌ش بیبه‌ینه پێشه‌وه.. له‌کۆتییدا ئێمه ته‌ئکید له هاوخه‌باتی ئه‌نته‌رناسیونالستی و تێکۆشانی هاوبه‌شی نێوان کۆمۆنیسته کرێکاریه‌کان له ئێران و کوردستان و ته‌واوی ناوچه‌که ده‌که‌ینه‌وه و له‌که‌نارتاندا بۆ خه‌بات له‌دژی ته‌واوی به‌شه‌کانی بۆرژوازی و بۆ گه‌یشتن به ئامانجه کۆمۆنیستیه‌کانمان ڕاده‌وه‌ستین.. دوباره‌ش هیوای سه‌رکه‌وتن بۆ ئێوه و کۆنگره‌که‌تان ده‌خوازین..
بژی ئازادی ، یەکسانی ، حکومەتی کرێکاری! بژی خەباتی نێونەتەوەیی و هاوبەشی کرێکاران و کۆمۆنیستەکان! حزبی کۆمۆنیستی کرێکاریی کوردستان ٢٠\٤\٢٩٠١٨
|
